LKJ-SONNY'S LETTAH

LINTON KWESI JOHNSON
SONNY'S LETTAH

from Brixton prison, Jebb Avenue London S.W 2 Inglan

dear mama
good day
I hope that when these few lines reach you they may
find you in the best of health
I doun know how to tell ya dis
for I did make a solemn promise
to take care a lickle Jim
an try mi bes fi look out fi him

mama, I really did try mi bes
but none a di less
sorry fi tell, poor lickle Jim get arres
it was di miggle a di rush hour
hevrybody jus a hustle an a bustle
to go home fi dem evenin shower
mi an Jim stand up waitin pon a bus
not causin no fuss

when all of a sudden a police van pull up
out jump tree policemen
de whole a dem carryin baton
dem walk straight up to me and Jim
one a dem hold on to Jim
seh dem tekin him in
Jim tell him fi leggo a him
for him nah do nutt'n
and 'im nah t'ief, not even a but'n
Jim strart to wriggle
de police start to giggle

mama, mek I tell you wa dem do to Jim?
mek I tell you wa dem do to 'im?

dem thump him in him belly and it turn to jelly
dem lick 'im pon 'im back and 'im rib get pop
dem thump him pon him head but it tough like lead
dem kick 'im in 'im seed and it started to bleed

mama, I jus couldn't stan up deh, nah do nuttin'

so mi jook one in him eye and him started fi cry
me thump him pon him mout and him started fi shout
me kick him pon him shin so him started fi spin
me hit him pon him chin an him drop pon a bin
-an crash, an dead

more policeman come dung
dem beat me to the grung
dem charge Jim fi sus
dem charge mi fi murdah

mama, doan fret
doan get depress an downhearted
be good of courage
till I hear from you
I remain
your son,
Sonny