U MARE DI CHINA

U mare di China

I Chjami Aghjalesi

Eramu una bella squadra
È tuttu era in cumunu
Ma spessu venia a ladra
A sera ne mancava unu.

È la luna chì splendia
Sopr'à u mare di china !

Pienghjiamu acciucciulati
Mezu à le rise è le cantate
Eppò li pienti siccati
Muria ogni lindumane.

E paghjelle in li caffè
Quandu sparia lu sole
D'induve noi u piacè
Venia carcu di fole.

T'arricordi a notte nuvella
E briachine guasi à more
È quelle donne à brusgia pella
È quelle donne à brusgia core.

Esciamu à ghjornu chjaru
Imbalsamati di vapori
Tutti ci paria raru
È cambiavanu li culori.

Ma lu sole ci fraiava
Cum'è palle infiarate
È la luna chì splendia
Sopr'à lu mare di china