من جديد: كأس حظر التجوال بمدن القناة
السلام والتحية على حضراتكو واهلا بيكو معانا ... خلاص على المصريين انهم يبقوا عارفين ان مالهومشي قيمة طالما مش من الاهل والعشيرة .. مش مهم ان الدم لسه ما نشفشي في الشارع والسيدة الأولى رايحة تتفسح في طابا، طبعا لو كان اللي ماتوا في خلال الاحداث اللي فاتوا كانوا من الاخوان كانت راحت عزت زي ما حصل قبل كدة وما راحتشي في عزا الشهيد جيكا، لكن السيدة الأولى زوجة الرئيس محمد مرسي سافرت طابا النهاردة على متن طيارة خاصة عشان تقضي يومين وتغير جو هناك، ومش مهم ان في امهات فقدت ولادها وشباب فقد اصحابه واخواته، كل ده مش مهم طالما دولا مش من الاهل والعشيرة ، طبعا السيدة الاولى مالهاش وضع معين داخل الدولة المصرية ولا ليها منصب سياسي بس من المفترض ان في حاجات مش محتاجة مناصب عشان يتعمل بناء عليها حاجات او ما يتعملشي حاجات.. لان بعيدا عن اي حاجة الدم اللي بيسيل ولسه بيسيل هو دم مصريين .. في بلد بتمر بأزمة والسبدة الأولى تروح طابا تغير جو.. حقها الصراحة.. مشاكلنا اتحلت .. وخلافتنا اتحلت .. ومابقاش حاجة نعملها الا اننا نروح نغير جو.. عموما .. حالة اللامبالة اصبحت حالة عامة ووصلت ان الناس بقت تنظم بطولات كورة في ساعة الحظر وعملوا كمان كاس الحظر .. وبقوا يتغلبوا على اي قرار يغم بالفرحة .