చంద్రబాబు తప్పు చేశారు.. బుద్దా వెంకన్న ఆసక్తికర వ్యాఖ్యలు

ఏపీ మంత్రి కొడాలి నానిపై మాజీ ఎమ్మెల్సీ బుద్దా వెంకన్న విరుచుకుపడ్డారు. గతంలో టీడీపీలో అందలం ఎక్కించి చంద్రబాబు తప్పు చేశారని.. చంద్రబాబు దగ్గర కొడాలి నాని బీఫాం తీసుకుని గెలవలేదా అంటూ ప్రశ్నించారు. కుక్కకు ఉన్న విశ్వాసం కూడా కొడాలి నానికి లేదన్నారు. మంత్రి పదవి పోతుందనే భయంతోనే నాని ఇష్టం వచ్చినట్లు మాట్లాడుతున్నారని.. పది రోజుల్లో కొడాలి నాని అవినీతి చరిత్ర మొత్తం బయటపెడతానన్నారు. పశ్చిమగోదావరి జిల్లాలో జంగారెడ్డిగూడెంలో కల్తీ సారా తాగి జనాలు‌ చనిపోయారన్నారు వెంకన్న. చంద్రబాబు బాధ్యతగా వెళ్లి బాధిత కుటుంబాలను పరామర్శించారని.. ముఖ్యమంత్రిగా ఉన్నా, ప్రతిపక్షం లో ఉన్నా ఆర్ధిక సాయం చేయడం‌ ఆయన నైజమన్నారు. అసెంబ్లీలో మదం ఎక్కి చంద్రబాబు సాయాన్ని కూడా తప్పు పట్టడానికి నానికి సిగ్గుండాలన్నారు. అతనికి సంబంధించిన సామాజిక వర్గాన్ని టార్గెట్ చేసి దూషిస్తున్నారని విమర్శించారు. అంతమంది చనిపోతే సాయం చేయాల్సిన ప్రభుత్వం విమర్శలు చేస్తుందని మండిపడ్డారు.