جموں و کشمیر میں شدید بارش اور سیلاب سے بھاری نقصان، دولہا سمیت سینکڑوں لوگ راستے میں پھنسے، ویڈیو دیکھیں

سرینگر: جموں و کشمیر کے ضلع رامبن میں موسلادھار بارشوں کی وجہ سیلاب اور لینڈ سلائیڈنگ کے واقعات سے بھاری تباہی مچی۔ خراب موسمی حالات کی وجہ سے کشمیر کو ملک کے دیگر حصوں سے جوڑنے والی 250 کلومیٹر طویل جموں سری نگر قومی شاہراہ پر ٹریفک معطل رہی جس کی وجہ سے ناشری اور بانہال کے درمیان کئی مقامات پر پہاڑوں سے ملبہ گرنے سے سینکڑوں گاڑیاں پھنس گئیں۔ پھنسے ہوئے لوگوں میں ایک ایسا خاندان بھی شامل ہے جو اپنے بیٹے کی شادی کے لیے رامبن سے ڈگڈول جا رہا تھا۔ انہیں اپنی گاڑیاں چھوڑ کر پیدل آگے بڑھنا پڑا۔ اس موقعے پر دولہا مشکور احمد نے کہا کہ "ہم صبح 6 بجے روانہ ہوئے اور ابھی یہاں پہنچے ہیں۔ ہم نے اپنی گاڑیاں فلائی اوور پر کھڑی کر رکھی ہیں۔ ہمیں کم از کم 5-6 کلومیٹر پیدل چلنا ہے۔ ہم حکومت سے اپیل کرتے ہیں کہ وہ قومی شاہراہ کو جلد صاف کرے تاکہ راستے میں پھنسے ہوئے لوگ اپنے ٹھکانوں پر پہنچ سکیں۔" مشکور احمد نے کہا کہ اگر راستہ صاف نہ ہوا تو دلہن کو بھی اسی طرح لانا پڑے گا۔" اس صورت حال میں یہاں رہنے والے مہاجر مزدوروں کی ایک بڑی تعداد کو بھی پریشانیوں کا سامنا کرنا پڑا۔ کئی لوگوں کا کہنا تھا کہ لینڈ سلائیڈنگ سے قومی شاہراہ کو نقصان پہنچنے کی وجہ سے وہ پیدل اپنی منزل تک پہنچنے پر مجبور ہیں۔ وہیں دوسری طرف ان خراب موسمی حالات کی وجہ سے خاص طور سے رامبن میں زیادہ تباہی مچی جہاں تین افراد کی موت ہوگئی جب کہ کئی گھروں، دکانوں اور سڑکوں کو بھی نقصان پہنچا۔ مزید پڑھیں: سرینگر جموں شاہراہ دوسرے روز بھی ٹریفک کے لیے بندجنوبی کشمیر کے علاقوں میں سیلابی صورتحال، لوگوں میں تشویش