المدرس ( احمد افندى محمد حامد عبد العال ) ... El Sheikh EMAM

قصيدة للشاعر أحمد فؤاد نجم
****
احمد افندى محمد حامد عبد العال
صاحب عيله جسيمه مراته وست عيال
عنده اسمالله حسن وحسين وسعيد ونوال
والمقروصه نفيسه وقدم الخير.. ووصال
احمد افندى مدرس عربى قديم ومتين
شكله تشوفه تقول على طول من اهل الدين
شايل سبحه خشب البندق م الغاليين
ساعه تلف يمين وسواعى تلف شمال
غير السبحه طالعه زبيبه ف قورته كمان
يعنى دليل على انه بيسجد للرحمن
هيبه وتقوى ومظهر ناطق بالايمان
ثم المشيه عليها القيمه وفيها جلال
احمد افندى ساكن شقه فى رابع دور
بيت الحاج عويس ومراته بدور
كانوا قبل ما يتأتى المقدور
ساعة نحس اتقلب البيت واتبدل الحال
ابن الحاج عويس كان عامل كوره شراب
والعصريه نازل يلعب جنب الباب
جاى بيشوط قام طارت فرده من القبقاب
جت فى زبيبه احمد افندى ودمها سال
ضحكت عيشه مرات السقا وقالت يوه
ظاطوا عيال الحاره وقالوا الجردل اهو
احمد افندى فوق عقله مابقاش له
رفع الواد قلمين سخنين كومه فى الحال
صرخت نوسه مرات محمود عبد الجواد
كبدى يا خويا يا ناس دا الراجل قتل الواد
نزل السيد سالم يجرى وقال يا ولاد
اوعوا الراجل يفلت منكوا دا موته حلال
احمد افندى زعق من تحت وقال يا حسين
هات سكينه ونزل اخوك ومعاك شومتين
نزلوا العيله اشتغل الضرب شمال ويمين
والصوت لعلع والنبابيت غنت موال
خش محمد مرسى يخلص فى الموضوع
خد سكينه ف جنبه وكان عيان موجوع
وقع الارض يئن وعينه تشر دموع
هى ثوانى وطلعت روحه للمتعال
هاجوا العالم والنسوان فقعت بالصوت
وامه تقول يا حبيبى ازاى دهولك الموت
واحمد افندى لم عياله وعلى برغوت
طلب النجده من تليفون عبده البقال
وصل النجده لقى حوالين الجثة اتنين
اخته بتطلم وامه بتتمرغ فى الطين
سأل الظابط فين امال المتخانقين
قالت نوسه من شباكها دابو وصال
طلعت هجمه ان شا الله ماحد يشوفها ياناس
رزعوا الباب فشخوه اتنين طار الترباس
خبط الحله قلبها وساح منها القلقاس
عاص القله ولغمط وش البت نوال
احمد افندى وقف على حيله وقال جرى ايه
انت ازاى تتهجم كده على بيتى يا بيه
لاشه الضابط جريوا عياله اتلموا عليه
حسن اترمى على ابوه واتشعلق فيه وصال
أمر الظابط للشرطيه بالتفتيش
واللى حيعتر فى السكينه حيبقى شاويش
بعد مالفوا اوضها ودخلوا وقالوا مفيش
لمح الظابط دم مبقع جنب شوال
زغد المخبر قال له ازاى بتقول فتشت
جرى من خوفه اتكعبل كوع جنب الطشت
لحقه زميله وقال جرى ايه مالك طبشت؟
قام مذهول مش قادر حتى يرد سؤال
مخبر تانى عشان موعود يترقى شاويش
فرد المطوه وهم يمزع بيها الخيش
أول خبطه اتخض وقال يا خبر ؟ دا حشيش
احمد افندى وقع من طوله فشر تمثال
كانت نزله ان شا الله ماحد يشوفها يا هوه
احمد افندى قفاه من حيل الضرب هروه
أربعه منهم شالوه وف قلب البوكس رموه
وام عياله تقول له يا سبع البيت يا غزال
ضحكت عيشه مرات السقا وقالت يوه
ظاطوا عيال الحاره وقالوا المجرم اهو
احمد افندى فوت عقله مابقاش له
صار يلطم على وشه يقول حبسونى عيال