سکونِ دل نہیں حاصل اگر تجھ کو زمانے سے - قتیل شفائی

سکونِ دل نہیں حاصل اگر تجھ کو زمانے سے
یہ دولت مانگ جاکر شاہﷺ یثرب کے خزانے سے
اے مانگنے والے تو اپنی جھولی کو ذرا پھیلا تو سہی
سب دل کی مرادیں پائے گا دربارِ نبیﷺ تک جا تو سہی
ہے رحمت اس کی سب کیلئے وہ چین ہر اک بے چین کا ہے
اس جیسا ہو گا کون سخی وہ نانا حسن حسین کا ہے
ہر بگڑا کام بنائے گا نام اس کا زباں پر لا تو سہی
اللہ نے کوہ طور پہ بھی موسیٰ کو نہ جلوہ دکھلایا
یہ شان ہے صرف محمدﷺ کی خود عرش پہ آپ ﷺ کو بلوایا
محبوبِ ﷺ خدا کے آگے تو کچھ دل کا حال سنا تو سہی
سب دل کی مرادیں پائے گا دربارِ نبیﷺ تک جا تو سہی
تو پھر بھی ہے کلمہ گو اس کا غیروں پہ بھی وہ کرتا ہے کرم
امت کا وہ پردہ پوش بھی ہے رکھ لے گا تیرا دنیا میں بھرم
کر دیگا خطائیں معاف تیری تو دل میں ذرا شرما تو سہی
سب دل کی مرادیں پائے گا دربارِ نبیﷺ تک جا تو سہی
غم کا مارا کوئی جب اس کو صدا دیتا ہے
کملی والا اسے کملی میں چھپا لیتا ہے
دربارِ نبیﷺ تک جا تو سہی
بلغ العلی بکمالہِ کشف الدجیٰ بجمالہ
حسنت جمیع و خصالہِ صلّو ا علیہ وآلہ دربارِ نبیﷺ تک جا تو سہی
بخشش بھی عنایت بھی رحمت بھی شفاعت بھی
جو مانگئے ملتا ہے دربارِ محمدﷺ سے دربارِ نبیﷺ تک جا تو سہی
اے مانگنے والے تو اپنی جھولی کو پھیلا تو سہی
سب دل کی مرادیں پائے گا دربارِ نبیﷺ تک جا تو سہی

فلم: نیا انداز (1979)۔۔ شاعری: قتیل شفائی
گلوکار : منیر حسین اور ساتھی ۔۔ موسیقار ایم حمید