धमक्या यापूर्वीही आल्यात; नक्षलवाद्यांना एकनाथ शिंदेंंचं थेट प्रत्युत्तर

ठाणे आणि गडचिरोलीचे पालकमंत्री आणि राज्याचे नगरविकास मंत्री एकनाथ शिंदे यांना कथितरित्या नक्षलवाद्यांकडून पत्राद्वारे धमकी मिळाल्यानंतर एकच खळबळ उडाली आहे. त्यामुळे एकनाथ शिंदे यांच्या सुरक्षेत वाढ करण्यात आली आहे. गडचिरोली येथे नक्षलवाद्यांविरोधातील मोहीमेत काही नक्षलवादी मारले गेले होते. त्या पार्श्वभूमीवर पत्राद्वारे धमकी देण्यात आली आहे. आता यावर एकनाथ शिंदे यांनी प्रतिक्रिया दिली आहे. गडचिरोली सारख्या ठिकाणी नक्षलवाद कमी करायचा असेल तर, त्या भागाचा मोठ्या प्रमाणात विकास झाला पाहिजे, हा एकच पर्याय असल्याचे त्यांनी सांगितले. तसेच यापूर्वी देखील मला अशाच धमक्या आल्या असून, माझ्यावर त्याचा काही परिणाम झाला नाही, असेही पालकमंत्री शिंदे यांनी सांगितले.