హోలీ సంబరాల్లో అదరహో అనిపిస్తున్న 'మల్లారెడ్డి మాస్​ డ్యాన్స్'

Mallareddy Dances in Holi Celebrations : కష్టపడ్డా, పాలమ్మినా, పూలమ్మినా సక్సెస్​ అయ్యా అనే డైలాగ్​ వినగానే మనకు యాదికొచ్చే ఒకే ఒక్క పేరు మాజీ మంత్రి, మేడ్చల్​ ఎమ్మెల్యే మల్లారెడ్డియే. తన మాటలు, చేష్టలు, ప్రసంగాలతో నిత్యం సోషల్​ మీడియాలో ట్రెండింగ్​లో నిలుస్తారు. ఆ మధ్య ఎన్నికలకు ముందు గొర్రెలను కాస్తూ ఒక డైలాగ్​ చెప్పారు. కష్టపడ్డా, పాలమ్మినా, పూలమ్మినా, ఇప్పుడు గొర్రెలు కాస్తున్నానంటూ గొర్రెలు కాస్తున్న వీడియోను సోషల్​మీడియాలో పోస్టు చేయగా తెగ వైరల్​ అయింది.

మల్లారెడ్డి మాటలనే పాటలుగా తీసుకుంటూ కొందరు డీజేలైతే ఏకంగా రీమేక్​ చేసేస్తున్నారు. ఆయన ఎక్కడ ఉంటే అక్కడ సందడి వాతావరణం, ఇతరుల్లో నింపే ఆ జోష్​నే వేరు. పండుగ, పెళ్లి, ఏదైనా ఓపెనింగ్​, పార్టీ సభ, కళాశాలలో ఏదైనా ప్రోగ్రాం పెట్టిన అక్కడ మల్లారెడ్డి ఉంటే ఆ ఊపే వేరు. విద్యార్థులకైతే ఇంక చెప్పాల్సిన అవసరమే లేదు. ఆయన స్టేజ్​ ఎక్కుతున్నారంటే ఓ ఊపున్న పాట వేసి ఆయన స్టెప్​లు వేయడమే కాకుండా మిగతా వారితోనూ డ్యాన్స్​లు చేయించే రకం మేడ్చల్​ ఎమ్మెల్యే మల్లారెడ్డి.

హోలీ సంబురాల్లో మల్లారెడ్డి డ్యాన్స్ : ఇప్పుడు తాజాగా హోలీ పండుగ సందర్భంగా తన కుటుంబ సభ్యులతో కలిసి సికింద్రాబాద్​లోని బోయిన్​పల్లిలో ఉన్న తన నివాసంలో పెద్ద ఎత్తున సంబురాలు జరుపుకున్నారు. ఎమ్మెల్యే మల్లారెడ్డి, మల్కాజిగిరి ఎమ్మెల్యే రాజశేఖర్​ రెడ్డిలు వారి కుటుంబ సభ్యులతోనూ, పిల్లలతోనూ కలిసి నృత్యాలు చేస్తూ సందడిగా గడిపారు. ఎమ్మెల్యేలు మల్లారెడ్డి, రాజశేఖర్​రెడ్డిలు ఒకరికొకరు రంగులు చల్లుకుంటూ సందడి చేశారు. ఈ సందర్భంగా మల్లారెడ్డి తన మనమరాళ్లను ఎత్తుకొని డ్యాన్స్​ చేస్తూ సంతోషంగా గడిపారు. అనంతరం బ్యాండ్​ వాయిస్తూ చిన్నారుల్లో ఉత్సాహం నింపారు. మల్లారెడ్డి బీట్​కు తగ్గ స్టెప్​లు వేస్తూ హుషారుగా గడిపారు.

దేశ ప్రజలంతా సుఖసంతోషాలతో హోలీ పండుగ జరుపుకోవాలని మాజీమంత్రి మల్లారెడ్డి ఆకాంక్షించారు. తన చిన్ననాటి నుంచి హోలీ సంబురాలు గొప్పగా జరుపుకుంటూ సందడి చేస్తామని తెలిపారు. రాబోయే సంవత్సరం తమ దంపతుల 50వ గోల్డెన్​ జూబ్లీ వివాహ వార్షికోత్సవాన్ని ఘనంగా జరుపుతామని వెల్లడించారు. దేశ ప్రజలంతా సంతోషంగా హోలీ జరుపుకోవాలని తెలిపారు.