जळगावात 'व्हॅलेंटाईन डे'च्या निमित्ताने विवाहासाठी तरुणांनी साधला मुहुर्त

'व्हॅलेंटाईन डे' म्हटलं तर प्रेमाचा दिवस. आणि हा दिवस कायम स्मरणात राहावा, अविस्मरणीय व्हावा यासाठी अनेक जण याच दिवशी विवाहाचा मुहूर्त साधत असतात. 'व्हॅलेंटाईन डे'चा मुहूर्त साधत जळगाव जिल्ह्यातील विवाहनोंदणी कार्यालयात सकाळपासून तरुणांची गर्दी झाली होती. एरव्ही दिवसभरात एक ते दोन विवाह पार पडणाऱ्या या कार्यालयात दिवसभरात तब्बल २० विवाह पार पडले. शुकशुकाट असणार्‍या विवाह नोंदणी कार्यालयाला आज सकाळपासूनच यात्रेचे स्वरुप प्राप्त झाले होते. हार, फुले अशा तयारीनिशी सकाळपासून या ठिकाणी वधू-वर व वऱ्हाडी हजर झाले होते. आनंद आणि उत्साहपूर्ण वातावरणात फुलांच्या वर्षावात तरूण तरूणींनी एकमेकांसोबत आयुष्यभरासाठीची रेशीमगाठ बांधली.