नवाब मलिकांच्या प्रकरणाशी संबंधित 'ईडी'कडून चौकशी सुरु

सक्तवसुली संचलनालयाकडून मंगळवारी सकाळी मुंबईच्या कुर्ला परिसरात छापेमारी करण्यात आली. काही वेळापूर्वीच ईडीच्या अधिकाऱ्यांचे पथक कुर्ला येथील गोवावाला कंपाऊंड परिसरात दाखल झाले आहे. सीआरपीएफचा सुरक्षा ताफा घेऊन ईडीचे अधिकारी याठिकाणी पोहचले. ईडीच्या अधिकाऱ्यांनी याठिकाणी आता चौकशीला सुरुवात केलीये. महाराष्ट्राचे कॅबिनेट मंत्री नवाब मलिक यांना कुर्ल्यातील गोवावाला कंपाउंड प्रॉपर्टी संदर्भात अंडरवर्ल्डशी संबंध असल्याचं समोर आल्यानंतर ईडीनं 23 फेब्रुवारीला त्यांना अटक केली होती. कुख्यात गुंड दाऊदची बहीण हसीना पारकर हिने हा भूखंड नवाब मलिका यांना विकला होता. या प्रकरणात सध्या नवाब मलिक यांची 'ईडी'कडून चौकशी सुरु आहे. त्यामुळे कुर्ला परिसरातील आजची छापेमारी नवाब मलिक यांच्याशीच संबंधित असल्याचा अंदाज आहे. प्राथमिक माहितीनुसार, ईडीचे अधिकारी कुर्ला परिसरात आल्यानंतर त्यांनी छाप्याच्या ठिकाणी उपस्थित असलेल्या एका ज्येष्ठ नागरिकाला प्रश्न विचारण्यास सुरुवात केली. त्यामुळे आजची छापेमारी नवाब मलिक यांना आणखी अडचणीत आणणार का, हे पाहावे लागणार आहे. याच पैशांचा वापर देशविघातक कारवायांसाठी झाल्याचा आरोप भाजपच्या नेत्यांकडून सातत्याने केला जातो. या प्रकरणात नवाब मलिक यांच्या राजीनाम्याची मागणी सातत्याने केली जात आहे. त्यामुळे ईडीच्या या छापेमारीनंतर नवाब मलिक यांच्याविरोधात आणखी काही ठोस पुरावे सापडणार का, हे पाहावे लागेल.